“Inter Maýaminiň” we Argentinanyň milli ýygyndysynyň hüjümçisi Lionel Messi taryhda iň köp titula eýe bolan futbolçy hökmünde “Marca” neşirinden baýrak aldy.
Penşenbe güni, 17-nji oktýabrda neşir 37 ýaşly oýunça onuň futbol meýdançasyndaky üstünliklerini belläp, ýörite baýrak gowşurdy. Dabara Fort-Loderdeýlde “Inter Maýaminiň” öý stadionynda geçirildi. Messi baýragy neşiriň müdiri Huan Ignasio Galýardonyň we amerikan klubunyň egindeş eýesi Horhe Masanyň elinden aldy.
Umuman alanyňda, Messi karýerasynda 46 topar baýragyny we 56 şahsy baýragy gazandy. Onuň hasabynda Olimpiýa altyn medaly, sekiz “Altyn top”, dünýä çempiony tituly, Çempionlar ligasynda dört ýeňiş bar.
Häzirki möwsümde Leo “Inter Maýami” üçin 18 oýna gatnaşyp, 17 takyk urgy we 10 assist bilen tapawutlandy.
Belläp geçsek, Messiniň “Inter Maýami” bilen häzirki şertnamasy 2025-nji ýylyň dekabr aýyna çenli hereket edýär.
