Dortmundyň “Borussiýasynyň” öňki kapitany Marko Roýs ABŞ-nyň Esasy futbol ligasynyň (MLS) “Los-Anjeles Gelaksi” kluby bilen şertnama baglaşdy. Ylalaşyk 2026-njy ýylyň ahyryna çenli hereket edýär diýip, amerikan klubunyň metbugat gullugyna salgylanyp, TASS habar berýär.
Karýerasynyň köp böleginde 35 ýaşly Roýs “Borussiýa” üçin çykyş etdi. Ol 2012 – 2024-nji ýyllar aralygynda Dortmundyň klubunda oýnap, ähli ýaryşlarda 429 oýna gatnaşdy. Bu bolsa toparyň taryhynda dördünji görkezijidir. Bu döwürde Roýs 170 gol we 131 netijeli geçirim bilen tapawutlandy. “Borussiýa” bilen bilelikde futbolçy Germaniýanyň Superkubogynyň üç gezek eýesi (2013, 2014, 2019) we ýurduň Kubogynyň iki gezek eýesi (2017, 2021) boldy, üç gezek Bundesligada möwsümiň oýunçysy diýlip ykrar edildi (2011/2012, 2013/2014 we 2018/2019 möwsümlerinde). Şeýle-de, ýarymgoragçy Mýonhengladbahdan “Borussiýa” üçin oýnady. Germaniýanyň milli ýygyndysynyň düzüminde 48 oýna gatnaşyp, 15 gol geçirdi.
Roýs “Gelaksi” toparyna erkin agent hökmünde geçdi, ýöne klub MLS-de çykyş edýän “Şarlott” klubuna $400 müň tölär, çünki hut şu klub öň germaniýaly oýunçy bilen şertnama baglaşmak üçin birinjilik hukugyny alypdy.
Şertnama baglaşylan wagty “Los-Anjeles Gelaksi” 26 tapgyrdan soň 49 utuk bilen MLS-iň Günbatar konferensiýasynda öňde barýar.
