Garet Sautgeýt Angliýanyň milli futbol ýygyndysynyň baş tälimçisi wezipesinden gidýändigini habar berdi.
Ýekşenbe güni angliýalylar Germaniýada geçirilen Ýewropa çempionatynyň finalynda Ispaniýanyň toparyndan 1:2 hasabynda utuldylar we yzygider ikinji gezek ýaryşyň kümüş medalyny gazandylar.
“Buýsanjaň iňlis hökmünde, men tutuş ömrüme Angliýa üçin oýnamagy we Angliýa tälim bermegi hormat hasaplaýardym. Meniň üçin bu hemme zady aňladýardy, men ähli güýjümi sarp etdim. Ýöne özgertmeleriň we täze ýolbaşçynyň wagty geldi. Ýekşenbe güni Berlindäki Ispaniýa garşy final Angliýanyň milli ýygyndysynyň tälimçisi hökmünde soňky oýnum boldy” – diýip, milli ýygyndynyň saýty Sautgeýtiň sözlerini getirýär.
“Maňa 102 oýunda güýçli futbolçylar toparyna ýolbaşçylyk etmek miýesser etdi. Olaryň her biri “üç ýolbars” köýnekçesini geýendigine buýsanýar. Olar öz ýurduna ençeme şöhrat getirdiler. Ähli zat üçin minnetdar, Angliýa” – diýip, Sautgeýt sözüniň üstüni ýetirdi.
Sautgeýt 53 ýaşynda, ol Angliýanyň milli ýygyndysyna 2016-njy ýyldan bäri ýolbaşçylyk etdi. Iki Ýewropa çempionatyndaky kümüş medaldan başga-da, angliýalylar Russiýada geçirilen 2018-nji ýylyň dünýä çempionatynda dördünji orny eýelediler.
Sautgeýt oýunçy hökmünde Angliýanyň “Kristal Pelas”, “Aston Willa” we “Midlsbro” toparlarynda çykyş etdi. 2006 – 2009-njy ýyllar “Mildsbro” tälimçi boldy. Şeýle-de, ol Angliýanyň ýaşlar toparynyň tälimçisi bolup işledi (2013 – 2016).
