Kolumbiýanyň milli ýygyndysy Urugwaýyň toparyny utup, ABŞ-da geçýän Amerikanyň Kubogynyň final oýnunda argentinanyň garşydaşy boldy.
Duşuşyk penşenbe gününe geçilýän gije Şarlott şäherinde (Demirgazyk Karolina ştaty) bolup, kolumbiýalylaryň 1:0 hasabynda ýeňiş gazanmagy bilen tamamlandy. Hames Rodrigesiň topy bermeginde 39-njy minutda Žefferson Lerman gol girizdi. Oýnuň köp bölegini kolumbiýalylar Daniel Munýosyň birinji ýaryma goşulan birinji minutda ikinji sary duýduryş üçin oýundan çetleşdirilendigi sebäpli azlykda oýnadylar.
Rodriges häzirki Amerikanyň Kubogy ýaryşynda altynjy gezek netijeli geçirim etdi. Bu 2011-nji ýyldan bäri iň gowy netijedir. Kolumbiýaly oýunçy 2021-nji ýylda ýaryşda bäş netijeli geçirim eden argentinaly Lionel Messiden öňe geçdi.
Kolumbiýanyň milli ýygyndysy taryhda üçünji gezek Amerikanyň Kubogynyň finalyna çykdy. 1975-nji ýylda kolumbiýalylar wise-çempion boldular, 2001-nji ýylda bolsa şu güne çenli ýeke-täk kubogyny gazandylar.
Urugwaýyň topary 14-nji iýula geçilýän gije üçünji ýer ugrundaky oýunda kanadalylar bilen duşuşar. Kolumbiýanyň we Argentinanyň toparlary 15-nji iýula geçilýän gije çempiony kesgitlärler. Duşuşyklaryň ikisi-de Aşgabat wagty bilen 05:00-da başlar.
