5-8-nji iýunda maliýe we ykdysadyýet ministri Serdar Joraýewiň ýolbaşçylygyndaky Türkmenistanyň Hökümet wekiliýeti rus tarapynyň çakylygy boýunça Russiýa Federasiýasynyň Sankt-Peterburg şäherinde iş saparynda bolup, XXVII Peterburg halkara ykdysady forumyna gatnaşýar.
Türkmen wekiliýeti forumyň çäklerinde birnäçe ikitaraplaýyn duşuşyklary geçirer, şeýle hem forumyň köpugurly çärelerine gatnaşar.
Sankt-Peterburg şäherinde 1997-nji ýyldan bäri geçirilýän, bu forum 27-nji gezek geçiriler. Şu ýylky forumyň esasy temasy: "Köppolýarly dünýäniň binýady - täze ösüş ugurlaryny kesgitlemek".
120 töweregi ýurtdan 10 müňden gowrak wekili özünde jemleýän bu çäre şu ýyl hem dünýä ýurtlarynyň onlarçasynyň hökümet agzalaryny, hususy pudagyň wekillerini we öňdebaryjy telekeçileri bir ýere jemledi. Türkmen wekiliýetiniň ýolbaşçysy forumyň mejlisinde çykyş edip, gyzyklanma bildirýän taraplar bilen uzakmöhletleýin hyzmatdaşlygy ýola goýmaga türkmen tarapynyň taýýardygyny tassyklady we hyzmatdaşlygyň ileri tutulýan ugurlaryny beýan etdi.
