Madridiň “Realynyň” hüjümçisi Winisius Žunior tamamlanan Çempionlar ligasy ýaryşynyň iň gowy oýunçysy diýlip ykrar edildi. Bu barada RIA Nowosti habar berýär. Braziliýaly 10 oýna gatnaşyp, alty gol we bäş netijeli geçirim bilen tapawutlandy. Ol ýaryşyň finalynda Dortmundyň “Borussiýasynyň” derwezesine girizilen ikinji goluň awtory boldy (2:0).
Iň gowy ýaş futbolçy diýlip möwsüm başlamazdan ozal “Borussiýadan” “Reala” geçen angliýaly Jud Bellingem bellendi. 20 ýaşly ýarym goragçy 11 oýna gatnaşyp, dört gol girizdi we bäş netijeli geçirim etdi.
Ýaryşyň simwoliki toparyna “Realyň” we “Borussiýanyň” her birinden dört oýunçy girdi. Topar doly görnüşde şeýle: Gregor Kobel (derwezeban), Ian Matsen, Mats Hummels, Marsel Zabitser (hemmesi – Dortmundyň “Borussiýasy”, Germaniýa), Antonio Rýudiger, Dani Karwahal, Jud Bellingem, Winisius Žunior (hemmesi – “Real”, Ispaniýa), Witinýa (“PSŽ”, Fransiýa), Fil Foden (Mançester Siti”, Angliýa), Harri Keýn (“Bawariýa”, Germaniýa).
