Diego Maradonanyň 1986-njy ýyldaky dünýä çempionatynyň iň gowy oýunçysy hökmünde alan “Altyn topunyň” satuwy kubok üçin hukuk babatynda gozgalan kazyýet işleri sebäpli soňa goýuldy. Fransiýanyň Aguttes auksion öýi söwdany 6-njy iýunda geçirmegi meýilleşdiripdi diýip, AP ýazýar.
Maradonanyň garyndaşlary kubogyň ogurlanandygyny aýdyp, ony satuwdan aýyrmagy talap etdiler. Nanteriň prokuraturasy bu iş boýunça derňewe başlady.
Kazyýet Maradonanyň maşgalasynyň auksiony gadagan etmek baradaky haýyşyny ret edip, ony kubok ýitenden soň hiç kimiň ogurlyk barada polisiýa arza bermändigi bilen delillendirdi, garyndaşlar bolsa polisiýanyň haýsydyr bir derňew işini geçirendigini subut edip bilmediler.
Muňa garamazdan, Aguttes potensial alyjylara päsgel berip biljek “dawalar we näbellilikler” sebäpli satuwy yza süýşürmek kararyna geldi.
Maradona baýragy 1986-njy ýylda Pariždäki dabarada aldy, ýöne ahyrynda ol ýitdi. Futbolçynyň garyndaşlary “Altyn top” 1989-njy ýylda Neapolyň bankyndaky seýfden ogurlanandyr diýip pikir edýärler. Käbir çeşmeler baýragyň pokerde utdurylan bolup, bergini üzmek üçin berlendigini çaklaýarlar. 2016-njy ýylda kubok şahsy kolleksiýadan lot hökmünde auksiona çykdy.
2020-nji ýylda aradan çykan Maradona ähli döwürleriň iň beýik futbolçylarynyň biri hasaplanýar. Ol “Boka Huniorsda”, “Barselonada”, “Napolide” we “Sewilýada” oýnady, şeýle-de Argentinanyň milli ýygyndysynyň düzüminde 1986-njy ýylyň dünýä çempionatynda ýeňiji boldy.
