31-nji maýda Türkmenistanda «Ýylyň talyby» Döwlet bilim bäsleşiginiň jemleýji tapgyry geçirildi. Bäsleşigiň jemleri boýunça Magtymguly adyndaky Türkmen döwlet uniwersitetiniň türkmen dili we edebiýaty fakultetiniň 3-nji ýyl talyby Hoşgeldi Paýzyýew «Ýylyň talyby — 2024» Döwlet bilim bäsleşiginiň ýeňijisi diýlip yglan edildi. Baýrakly orunlara eýe bolanlara diplomlar we ýadygärlik sowgatlary gowşuryldy. Bu barada Magtymguly adyndaky TDU-da habar berdiler.
Türkmenistanyň Bilim ministrliginiň, Kärdeşler arkalaşyklarynyň Milli merkeziniň, Magtymguly adyndaky Ýaşlar guramasynyň Merkezi geňeşiniň bilelikde guramagynda geçirilen bilim bäsleşigine deslapky tapgyrlarda özüniň ýokary görkezijileri boýunça tapawutlanan talyplar gatnaşdylar.
Bäsleşige gatnyşyjylar ylmy-döredijilik we dersara bäsleşiklerinde, halkara ders olimpiadalarynda gazanan üstünlikleri, medeni-köpçülikleýin çärelere gatnaşygy, sport ýaryşlaryndaky ýeňişleri, köpçülikleýin habar beriş serişdelerinde çykyşlary üçin kesgitlenen utuklar ulgamy bilen bahalandyrylyp, her ýokary okuw mekdebinden iň ýokary netije gazanan talyp jemleýji tapgyra gatnaşmaga hukuk gazanýar.
Jemleýji tapgyrda ýokary okuw mekdeplerine wekilçilik edýän talyplar Türkmenistanyň jemgyýetçilik durmuşyny öwreniş, türkmen we iňlis dili dersleri, kompýuter sowatlylygy boýunça taýýarlanan test sowallaryna jogap berdiler. Şeýle hem talyplar saýlap alan ugurlary esasynda gysga sahna, çeper okaýyş, aýdym-sazly erkin çykyşlar boýunça özara bäsleşdiler.
Magtymguly adyndaky TDU-da habar bermeklerine görä, 2024-nji ýylda “Ýylyň talyby” bolan Hoşgeldi Paýzyýew Türkmenistanda we daşary ýurtlarda geçirilýän ençeme ders, taslama-döredijilik bäsleşiklerinde, halkara olimpiadalarda ýeňiji bolmagy başardy.