Professional boksda birbada birnäçe abraýly gurama bolup, olaryň her biri öz dünýä çempiony guşagyny berýär. Haçan-da boksçy ähli möhüm wersiýalar boýunça çempion bolanda, ol absolýut diýlip atlandyrylýar.
Ýakynda Er-Riýadda (Saud Arabystany) geçirilen söweşde britaniýaly Taýson Fýurini ýeňip, ukrainaly Aleksandr Usik 1999-njy ýyldan bäri super agyr agramda ilkinji absolýut dünýä çempiony boldy. Usik Bütindünýä boks assosiasiýasynyň (WBA), Bütindünýä boks guramasynyň (WBO) we Halkara boks federasiýasynyň (IBF) wersiýalary boýunça dünýä çempiony titullaryny gorady hem-de Fýurä degişli bolan Bütindünýä boks geňeşiniň (WBC) guşagyny aldy.
Indi 1-nji iýunda ukrainaly IBF guşagyndan, şonuň bilen birlikde absolýut çempion adyndan mahrum bolar diýip, insaýder Maýkl Benson belleýär. Muny Daily Mail neşiri tassyklaýar.
Usik guşagy gorap bilmez, sebäbi Taýson Fýuri bilen rewanşa taýýarlanar. Şonuň üçin 1-nji iýunda IBF tituly üçin Filipp Hrgowiç we Daniel Dýubua göreşer. Bensonyň maglumatlaryna görä, Entoni Joşua titul söweşini geçirmek üçin eýýäm Hrgowiç – Dýubua söweşiniň ýeňijisine çagyryş etmäge taýýarlanýar.
Ýeri gelende bellesek, bu ýagdaý köp sanly boks wekilleriniň nägileligine sebäp boldy.
