Almatyda Al-Faraby adyndaky Gazak milli uniwersitetiniň kitaphanasynda akyldar şahyryň 300 ýyllygyna bagyşlanyp, "Magtymguly Pyragy - gündogar edebiýatynyň söz ussady" atly Halkara maslahaty geçirildi. Maslahaty Türkmenistanyň ilçihanasy Gazagystan Respublikasynyň Prezidentiniň ýanyndaky Milli Ylymlar akademiýasy bilen bilelikde gurady. Bu barada TmCars-a ýurdumyzyň Gazagystandaky ilçihanasynda habar berdiler.
Çärä Milli Ylymlar akademiýasynyň ýolbaşçylary, Gazagystanda ygtyýarlandyrylan ilçiler we baş konsullar, Magtymgulynyň döredjiligini öwrenýän gazak alymlary, belli ýazyjylar, filosoflar we filologlar gatnaşdy.
Çykyşlarda halkara jemgyýetçiligini dünýä edebiýatynyň altyn gaznasyna giren Magtymgulynyň döredijiligi bilen tanyşdyrmagy dowam etdirmegiň zerurlygy bellenildi.
Şeýle hem maslahatyň çäklerinde amaly-haşam sungatynyň, şekillendiriş sungatynyň we fotosuratlaryň sergisi ýaýbaňlandyryldy.
Kitap tekjelerinde Türkmenistanyň Prezidentiniň we Halk Maslahatynyň Başlygynyň kitaplary, şeýle hem Magtymguly Pyragynyň goşgular ýygyndysy ýerleşdirildi.
