Deadline neşiri häzirki wagtda Kristofer Nolanyň iň soňky filmi bolan “Oppengeýmeriň” maliýe görkezijilerini çap etdi. Ygtybarly çeşmeleriň esasynda žurnalistler “Oskar” baýragyny alan filmiň takmynan çykdajylaryny we girdejilerini hasapladylar. Maglumatlar 2023-nji ýylyň ahyryna çenli ýagdaýa esaslanýar diýip, championat.com habar berýär.
Şeýlelikde, Universal Pictures filmiň üsti bilen, takmynan, 722 mln dollar gazandy – bu mukdara kinoteatrlardaky prokat (takmynan, 422 mln dollar), filmiň fiziki nusgalarynyň Blu-Ray-daky satuwy (130 mln dollar) we onlaýn-kinoteatrlarda we telewideniýede görkezmelerden tölegler (170 mln dollar) girýär. Şol bir wagtyň özünde, film üçin çykdajylar 520 mln dollara barabar – bu mukdara önümçilik (100 mln dollar) we marketing (170 mln dollar) býujetleri, surata düşüriji toparyň gonorarlary (175 mln dollar) we beýleki çykdajylar (75 mln dollar) girdi.
Ahyrky netijede, Universal Pictures, takmynan, 202 mln dollar baýady – bu mukdar täze fiziki nusgalaryň satyn alynmagy, striminglerde we telewideniýelerde tomaşalar arkaly artmagyny dowam etdirýär. Şeýle görkezijiler bilen “Oppengeýmer” 2023-nji ýylyň iň girdejili filmleriniň sanawynda bäşinji orny eýeleýär, film “Wonkadan”, “Galaktikanyň sakçylary 3-den” we “Freddi bilen bäş gijeden” öňe geçýär.
