«Türkmenhimiýa» döwlet konserniniň «Marykarbamid» zawodyny bökdençsiz işletmek üçin Ýaponiýanyň «Kawasaki» kompaniýasy bilen gönümel hyzmatdaşlyk ýola goýlar. Bu barada 19-njy aprelde geçirilen Hökümet mejlisinde habar berildi.
“Watan” habarlar gepleşiginde habar berlişi ýaly, wise-premýer B.Annamämmedow zawody taslama kuwwatyna çykarmak maksady bilen, “Kawasaki Heavy Industries, Ltd” ýapon kompaniýasy bilen hyzmatdaşlygy ýola goýmagyň maksadalaýyk hasaplanylýandygyny belledi. Şunuň bilen baglylykda, Türkmenistanyň Prezidentiniň garamagyna degişli teklip hödürlenildi.
Prezident Serdar Berdimuhamedow «Marykarbamid» zawodyny bökdençsiz işletmek üçin tehnologiki kadalara laýyklykda önümçiliklerde ulanylýan çig mallar, himiki serişdeler bilen yzygiderli üpjünçiligini ýola goýmak maksady bilen, Ýaponiýanyň «Kawasaki» kompaniýasy bilen gönümel hyzmatdaşlygy ýola goýmak boýunça teklibi goldady we wise-premýere bu ugurda degişli işleri geçirmegi tabşyrdy.
