Tim Szýu professional karýerasynda ilkinji ýeňlişine sezewar boldy. Las-Wegasda ol amerikaly Sebastýan Fundoradan emin agzalarynyň tapawutly karary bilen ýeňildi.
Birinji orta agramda WBO we WBC çempion titullary ugrunda söweş doly 12 raund dowam etdi. Szýu WBO guşagyny gorap bilmedi, Fundora bolsa erkin WBC titulyny gazanmakdan daşary 29 ýaşly Szýuny ilkinji ýeňlişe sezewar etdi.
26 ýaşly Fundora üçin bu ýeňiş professional karýerasynda 21-nji boldy, onuň bir ýeňlişi we bir deňme-deňligi bar. Ilkibaşda Szýu Kit Turman bilen söweşmelidi, ýöne ol şikes aldy. Şol sebäpli Fundora söweşden 12 gün öň onuň ýerine geçdi.
