Türkmenistanda Änew şäheriniň 2024-nji ýylda “Türki dünýäsiniň medeni paýtagty” diýlip yglan edilmegi mynasybetli çäreler badalga aldy.
26-njy martda Ahal welaýatynyň Ak bugdaý etrabynyň Nowruz ýaýlasynda çäreleriň açylyş dabarasy geçiriler. Dabaranyň çäklerinde konsert, sergi we beýleki çäreler geçiriler. Çärelere türki döwletleriň wekilleriniň, şeýle hem halkara guramalarynyň ýolbaşçylarynyň gatnaşmagyna garaşylýar.
28-nji martda "Türkmen topragy - gadymy medeniýetleriň merkezi" atly mediaforum geçiriler. Ol diňe bir Änew şäherine däl, eýsem, Magtymguly Pyragynyň 300 ýyllygyna hem bagyşlanýar. Çärä TÜRKSOÝ döwletlerinden žurnalistler we Türkmenistanyň Telewideniýe, radiogepleşikler we kinematografiýa baradaky döwlet komitetiniň hyzmatdaşlary gatnaşar. Forum 4 bölümçede geçiriler - "Türki medeniýetiniň bitewiligi we onuň HBS-däki orny", "Pähim-paýhas ummany Magtymguly Pyragy", "Sanly media we täzelikler" we "Filmler, animasiýalar we kinofestiwallary".
Myhmanlar üçin Aşgabadyň we Arkadag şäherleriniň taryhy we medeni ýerlerine syýahat guralar.
27-28-nji martda "Türkmenistanda syýahatçylygy ösdürmegiň esasy ugurlary we mümkinçilikleri" atly halkara maslahat geçiriler. Maslahata halkara guramalarynyň ýolbaşçylary we dürli ýurtlaryň syýahatçylyk operatorlary çagyryldy.
Maslahatyň çäklerinde hünärmenleriň duşuşyklaryny, ylmy-amaly forumy geçirmek, şeýle hem hyzmatdaşlyk hakynda resminamalara gol çekmek meýilleşdirilýär.
29-njy martda Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň üç ýyllygy mynasybetli giň gerimli çäreler geçiriler.
