Angliýanyň «Mançester Siti» toparynyň futbolçysy Erling Holand «Globe Soccer Awards» garaýşyna görä, ýylyň iň gowy oýunçysy diýen ada mynasyp boldy.
Baýrak gowşurylyş dabarasy Dubaýda geçiridi. Şeýle hem bu baýraga Kriştianu Ronaldu («Al-Nasr»), Mohamed Salah («Liwerpul»), Jud Bellingem, Winisius Žunior (ikisi hem «Real Madrid»), Bernardu Silwa («Mançester Siti»), Lionel Messi («Inter Maýami»), Karim Benzema («Al-Ittifak») Kilian Mbappe («PSŽ»), Wiktor Osimhen («Napoli») dalaşgär görkezildi.
Holand «Mançester Siti» bilen bilelikde Angliýanyň çempiony, ýurduň Kubogynyň eýesi, Çempionlar ligasynyň, UEFA-nyň Superkubogynyň we klublaryň arasynda dünýä çempionatynyň ýeňijisi boldy. Topardaky ilkinji möwsüminde 53 oýunda 52 pökgi geçirip, Angliýanyň premýer-ligasynda (APL) geçirilen gollaryň sany boýunça rekordy täzeledi. Ondan öň ol Ýewropanyň futbol assosiasiýalary bileleşigi (UEFA) tarapyndan Ýewropadaky möwsümiň iň gowy oýunçysy diýlip ykrar edildi.
Angliýanyň «Mançester Siti» futbol toparynyň baş tälimçisi ispaniýaly Pep Gwardiola «Ýylyň iň gowy tälimçisi» kategoriýasynda «Globe Soccer Awards» baýragyna mynasyp boldy.
Geçen ýyl Gwardiolanyň ýolbaşçylygynda «Mançester Siti» Çempionlar ligasynyň, Klublaryň arasyndaky dünýä çempionatynyň ýeňijisi, Angliýanyň çempiony, ýurduň Kubogynyň we UEFA-nyň Superkubogynyň eýesi boldy.
Angliýanyň «Mançester Siti» futbol topary«Globe Soccer Awards» tarapyndan «Ýylyň iň gowy topary» kategoriýasynda ýeňiji saýlandy.
Ýylyň iň gowy zenanlar topary Ispaniýanyň «Barselonasy» boldy.
Angliýanyň we Londonyň «Çelsi» toparynyň öňki goragçysy Jon Terri, Argentinanyň milli ýygyndysy bilen dünýä çempiony bolan tälimçi Lionel Skaloni we Braziliýanyň ýarymgoragçysy Kazemiro karýerasyndaky gazanan üstünlikleri üçin sylaglandylar.
Beýleki kategoriýalardaky netijeler:
- Iň gowy derwezeban – Ederson («Mançester Siti»);
- Iň gowy ýarymgoragçy – Rodri («Mançester Siti»);
- Iň gowy toparyň prezidenti – Haldun Al-Mubarek («Mançester Siti»);
- Ýylyň iň gowy ýaş oýunçysy – Jud Bellingem («Real Madrid»);
- Ýylyň iň gowy zenan futbolçysy – Aýtana Bonmati («Barselona»).
