16-njy ýanwarda Türkmenistanyň Prezidenti Serdar Berdimuhamedow Döwlet howpsuzlyk geňeşiniň giňişleýin göçme mejlisini geçirdi. Onda ýurdumyzyň harby we hukuk goraýjy edaralary tarapyndan 2023-nji ýylda alnyp barlan işleriň netijelerine garaldy hem-de bu edaralaryň öňünde durýan ileri tutulýan wezipeler kesgitlenildi. Bu barada “Watan” habarlar gepleşiginde habar berildi.
Şeýle hem ýurdumyzda howpsuzlygy we asudalygy üpjün etmek, harby we hukuk goraýjy edaralaryň maddy-enjamlaýyn binýadyny pugtalandyrmagyň, olaryň işini has-da kämilleşdirmek bilen baglanyşykly meseleler ara alnyp maslahatlaşyldy.
Mejlisiň barşynda harby we hukuk goraýjy edaralarynyň ýolbaşçylary garamagyndaky edaralar tarapyndan 2023-nji ýylda ýerine ýetirilen işler barada hasabat berdiler.
Mejlisiň barşynda Serdar Berdimuhamedow prokuratura edaralarynyň işini pes derejede gurap, wezipe borçlaryny talabalaýyk ýerine ýetirmändigi üçin, Türkmenistanyň Mejlisiniň razylygy bilen S.Mälikgulyýewi Türkmenistanyň Baş prokurory wezipesinden boşatdy.
Türkmenistanyň Baş prokurory wezipesine Begmurat Muhamedow bellenildi.
Şeýle hem ýurdumyzyň Ýaragly Güýçleriniň Belent Serkerdebaşysy, goşun generaly Serdar Berdimuhamedow Döwlet howpsuzlyk geňeşiniň agzalaryna ýüzlenip, ýurdumyzyň garaşsyzlygyny we özygtyýarlygyny pugtalandyrmaga, howpsuzlygy, jemgyýetçilik we hukuk tertibini üpjün etmäge goşan şahsy goşantlaryny göz öňünde tutup, harby we hukuk goraýjy edaralaryň käbir ýolbaşçylaryna harby we ýörite atlary hem-de hünär derejesini bermek barada kararyna gelendigini aýdyp, degişli Permanlara gol çekdi.
