“Barbi” “Garri Potterden” öňe geçip, Warner Bros. kompaniýasynyň iň girdejili filmi boldy

Nobatdaky uikendiň jemi boýunça “Barbi” ABŞ-da ýene 18,2 mln dollar ýygnap, sebitdäki girdeji ýygymyny 594 mln dollara ýetirdi. Demirgazyk Amerikanyň çäginden daşary filmiň girdejisi 745 mln dollardan geçip, onuň umumy görkezijisini 1,34 mlrd dollara ýetirdi. Bu barada championat.com habar berýär.

Şeýlelik bilen, “Barbi” Warner Bros. kompaniýasynyň taryhynda iň köp girdeji gazanan film boldy. Bu orny 12 ýyllap 1,31 mlrd dollar netije bilen “Garri Potter we Ölüm peşgeşi: Bölüm 2” filmi saklapdy. 2023-nji ýylyň görkezijileri barada aýdylanda, bu ýerde Greta Gerwigiň filmi diňe 1,35 mlrd dollar girdejili “Doganlar Super Mario” kartinasyndan yza galyp, ikinji orny eýeleýär.

Warner Bros. kompaniýasynyň taryhynda iň köp girdeji gazanan filmler:

1. “Barbi” (2023) - $1,34 mlrd;
2. “Garri Potter we Ölüm peşgeşi: Bölüm 2” (2011) - $1,31 mlrd;
3. “Akwamen” (2018) - $1,14 mlrd;
4. “Gara rysar: Legendanyň täzeden döreýşi” (2012) - $1,08 mlrd;
5. “Joker” (2019) - $1,06 mlrd;
6. “Hobbit: Garaşylmadyk syýahat” (2012) - $1,01 mlrd;
7. “Gara rysar” (2008) - $998 mln;
8. “Garri Potter we jadygöýüň daşy” (2001) - $965 mln;
9. “Hobbit: Smaugyň çöllügi” (2013) - $959 mln;
10. “Garri Potter we Ölüm peşgeşi: Bölüm 1” (2010) - $951 mln.