Microsoft kompaniýasy Windows programmalaryna, şol sanda Paint grafiki redaktoryna emeli intellekt funksiýasyny goşmagy meýilleşdirýär. Windows Central-yň habar bermegine görä, kompaniýa ulanyjy tarapyndan girizilen tekst düşündirişine esaslanyp, şekil döredip biljek algoritmi Paint-e birleşdirmek mümkinçiligini göz öňünde tutýar diýip, gazeta.ru belleýär.
Algoritm Bing Image Creator serwisi tarapyndan eýýäm ulanylýan neýroulgama esaslanar. Çeşme Paint-iň täze funksiýalary bolan täzelenen interfeýsiniň maketini hem çap etdi. Grafiki redaktorda Magic Paint düwmesi we gapdal panel peýda bolmaly, bu ýerde ulanyjy isleg bildirilýän şekiliň parametrini görkezip biler. Soňra alnan şekil islege görä geljekki üýtgetmeler ýa-da ýatda saklamak üçin düşege geçirilýär.
Paint-den başga-da, emeli intellekt funksiýasy “Fotografiýalar”, “Kamera” we “Gaýçy” ýaly beýleki Windows programmalaryna-da girizilip bilner. Olar fotografiýalarda we ekran suratlarynda ýüzi we teksti tanamak mümkinçiligini alarlar, bu hem grafiki maglumatlar bilen işlemegi aňsatlaşdyrar.
Täze funksiýanyň Windows-da haçan peýda boljakdygy belli däl. Microsoft operasion sistemasynyň indiki uly täzelenmesi 2024-nji ýyla meýilleşdirilýär.
Microsoft kompaniýasy heniz bu maglumat barada teswir bermedi.
