Geçen dynç günleri Kristofer Nolanyň “Oppengeýmer” filminiň dünýädäki girdeji ýygymy 700 mln dollardan geçdi. Relizinden bir aý geçenden soň film şu ýylyň iň köp girdeji gazanan kartinalarynyň reýtinginde dördünji orny eýeledi. Bu barada forbes.kz belleýär.
21-nji iýulda premýerasy bolan “Oppengeýmer” amerikaly fizik Robert Oppengeýmer barada gürrüň berýär. Onuň ýolbaşçylygynda Ikinji jahan urşy döwründe atom bombasy döredilýär. Alymy aktýor Kilian Mýorfi oýnady. Film Kaý Berd we Martin Şerwin tarapyndan ýazylan we Pulitser baýragyny alan “Amerikaly Prometeý: J. Robert Oppengeýmeriň ýeňşi we tragediýasy” kitabyna esaslanýar. Lenta Greta Gerwigiň “Barbi” filmi bilen bir günde çykdy.
Häzirki wagtda Nolanyň lentasy 717,8 mln dollar gazandy – olardan 285,2 mln dollar ABŞ-da we 432,6 mln dollar halkara bazarynda. Film girdeji ýygymy boýunça “Forsaž-10-dan” (dünýä prokatynda $704 mln) we “Möý adam: Älemleriň kerebinden” ($686 mln) öňe geçdi, ýöne “Doganlar Super Mario kinoda” ($1,35 mlrd), “Barbi” ($1,279 mlrd) we “Galaktikanyň sakçylary: Bölüm 3” ($845 mln) filmlerinden yzda barýar. Şeýle-de, “Oppengeýmer” Kristofer Nolanyň “Başlangyç” ($837 mln), “Gara rysar” ($1,006 mlrd) we “Gara rysar: Legendanyň täzeden dünýä inişi” ($1,08 mlrd) filmlerinden soň iň girdejili dördünji filmi boldy.
“Oppengeýmerde” Kilian Mýorfiden başga-da, Emili Blant, Mett Deýmon, ýaş Robert Dauni we beýlekiler oýnady. Bu Nolanyň Warner Bros. bilen köpýyllyk hyzmatdaşlykdan soň Universal Pictures kinostudiýasynyň howandarlygynda surata düşürilen ilkinji filmidir.
