Güýzki «Xiaomi 13T Pro» flagmany «Xiaomi 13-iň» esasy seriýasynyň stilinde dizaýn ediler we iki reňkde (gök we gara) çykarylar. Munuň şeýledigini enjamyň «MySmartPrice» neşirinde çap edilen ilkinji ýokary hilli suratlarynda görmek bolýar.
Suratlarda gök reňkli nusganyň arka gapagynyň sintetik deriden ediljekdigi görkezilýär. Gara smartfon matowyý panel bilen üpjün ediler. Enjamyň çarçuwasy tekiz, ekranda 20 megapikselli frontal kamera üçin «o» görnüşli bölüm göz öňünde tutulypdyr. Yzky surat modulynda «Xiaomi 13-iňki» ýaly keseligine ýerleşdirilen üç sany linza bar.
Smartfon 144 Gs täzelenme tizligi we 2712-den 1220-ä piksel durulygy bolan 6,67 dýuýmlyk OLED ekrany, iň täze sekiz ýadroly «MediaTek Dimensity 9200 Plus» prosessory, şeýle hem 16 GB operatiw we 512 GB çenli ulanyjy ýady bilen üpjün ediler.
Esasy kamera hökmünde 50 MP durulykly «Sony IMX707» sensory çykyş eder. Zum üçin 50 MP-lik teleobýektiw we 13 MP-lik ultragiňburçly kamera bilen esasy kameranyň üsti ýetiriler.
«Xiaomi 13T Pro» 2023-nji ýylyň 1-nji sentýabrynda Ýewropada çykar diýlip garaşylýar. Enjamyň bahasy aýan edilmeýär. Bu nusganyň Hytaýda «Redmi K60 Ultra» ady bilen hödürlenjekdigi mälimdir.
