«Inter Maýami» Leagues Cup çempionatynyň ýarym finalynda «Filadelfiýa Ýunion” toparyndan üstün çykyp, Demirgazyk Amerikanyň we Meksikanyň futbol toparlarynyň arasyndaky ýaryşyň finalyna çykdy.
Çesterde geçirilen (Pensilwaniýa ştaty, ABŞ) duşuşyk 4:1 hasabynda tamamlandy. Ýeňiji toparyň düzüminde Hosef Martines (3-nji minut), Lionel Messi (20), Jordi Alba (45 + 3) we Dawid Ruis (84) tapawutlanmagy başardy.
Messi gol geçirmek dowamlylygyny alty oýuna çenli uzaltdy. «Inter Maýamä» geçeninden soň, argentinaly futbolçy gol salmazdan meýdançadan çykmady. Ol alty duşuşykda dokuz pökgi geçirdi we bir ýardam pasyny berdi. Messi «Inter Maýami-niň» iň köp pökgi geçiren oýunçylarynyň sanawynda üçünji orunda barýar, rekord bolsa Gonsalo Iguaine degişlidir (29).
«Inter Maýami» Leagues Cup çempionatynyň birinjiligi üçin 18-nji awgustda «Neşwil» bilen duşuşar.
Eýeleriniň hatarynda Angliýanyň milli ýygyndysynyň öňki kapitany Dewid Bekham hem bolan «Inter Maýami» 15-nji iýulda Messiniň düzümine geçendigini yglan etdi. Argentinaly futbolçy Ispaniýanyň «Barselona» toparynyň uçurymydyr, ol toparyň düzüminde on gezek Ispaniýanyň çempiony we dört gezek Çempionlar ligasynyň ýeňijisi boldy. Ol 2021-nji ýylda Fransiýanyň «Pari Sen-Žermen» toparyna geçip, iki gezek milli çempionatda we bir gezek Fransiýanyň Super kubogynda ýeňiji boldy. Argentinanyň milli ýygyndysynyň düzüminde Messi dünýä çempiony we Amerikanyň kubogynyň eýesi boldy. Argentinaly futbolçy «Altyn pökgä» ýedi gezek mynasyp boldy.
