«Inter Maýami» Ligalaryň kubogynyň 1/8 final duşuşygynda «Dallas» toparyndan üstün çykdy. Bu çempionata MLS-den we futbol boýunça Meksikanyň çempionatyndan (Liga MX) toparlar gatnaşýarlar.
Tehas ştatynyň Frisko şäherinde geçirilen duşuşygyň esasy wagty 4:4 hasabynda tamamlandy. Penalti tapgyrynda Maýaminiň topary has güýçli geldi.
«Inter Maýami» toparynyň ýyldyz hüjümçisi Lionel Messi duşuşykda garşydaşyň derwezesine iki pökgi geçirdi. Argentinaly futbolçy 85-nji minutda uzak aralykdan jerime urgusyny üstünlikli ýerine ýetirip, hasaby 4:4 etdi.
Şeýlelikde, birnäçe gezek «Altyn topa» mynasyp bolan oýunçy yzygiderli üçünji dublyny amala aşyrdy. Messiniň «Inter Maýami» üçin dört duşuşykda jemi ýedi goly girizendigini hem bellemek gerek.
