“Inter Maýaminiň” Lionel Messiniň gatnaşmagynda boljak ilkinji myhmançylykdaky oýnunda anşlaga garaşylýar diýip, Bloomberg agentligi habar berýär. Muny championat.com ýetirýär.
Ligalaryň kubogynyň 1/8 finalynda “Inter Maýami” “Dallas” bilen duşuşar. Bu oýun üçin petekler 10 minutda satyn alyndy. Bellenilişi ýaly, oýna şeýle gyzyklanma bu duşuşykda argentinaly hüjümçi Lionel Messiniň oýnamagy bilen baglanyşykly bolup biler.
Iň arzan orunlar 299 dollara durýardy, resmi täzeden satylýan petekleriň bahasy bolsa 600 dollardan geçýär. Dallas şäheriniň demirgazyk etegindäki stadion 20 000 töweregi adamy sygdyrýar.
Ýatlap geçsek, Ligalaryň kubogynyň 1/16 finalynyň “Orlando” bilen geçenki oýnunda argentinaly hüjümçi iki gol geçiripdi.
Messi “Inter Maýamä” tomusky transfer penjiresinde geçdi. Oýunçynyň klub bilen şertnamasy 2025-nji ýyla çenli niýetlenýär.
