Beýik Britaniýada Stagecoach sürüjisiz awtobuslary ýola çykdylar. Olar Şotlandiýanyň paýtagty Edinburg bilen Faýf okrugynyň arasynda ýolagçylary gatnadarlar. Kompaniýa sürüjisiz awtobuslary CAVForth maksatnamasynyň çäklerinde 2025-nji ýyla çenli synagdan geçirer diýip, incrussia.ru habar berýär.
Awtobuslar sürüjisiz diýlip atlandyrylsa-da, salonda iki adamdan ybarat ekipaž bolýar. Birinji işgär ulag serişdesini gözegçilikde saklaýar, ikinjisi – kapitan – müşderilere hyzmat edip, petek satýar. Işläp düzüjileriň meýilnamasy boýunça, awtonom transport ýol howpsuzlygyny ýokarlandyryp, ulag serişdeleriniň könelmegini azaltmaly.
“Biz Şotlandiýanyň gündogarynda sürüjisiz awtobuslaryň ilkinji tapgyryny işe girizmäge şat bolduk” – diýip, Stagecoach UK-nyň dolandyryjy müdiri Karla Stokton aýtdy. Ol sürüjisiz marşrutlaryň işe girizilmeginiň jemgyýetçilik transportynyň ösüşinde täze tapgyrdygyny sözüniň üstüne goşdy.
Stagecoach şular ýaly bäş awtobusyň hepdede 10 müňe golaý adamy gatnadyp biljekdigini nygtaýar. Ulaglar AB1 diýlip atlandyrylan sistema berk salnan ugur boýunça hereket ederler. Onuň uzynlygy 21 km, ulaglar sagatda 75 km tizlik bilen hereket eder. Bu hökümet tarapyndan pul kömegi bilen goldanylýan ýurtda ilkinji sürüjisiz marşrutdyr.
CAVForth Beýik Britaniýada awtonom ýolagçy awtobus gatnawyny ösdürmek boýunça Şotlandiýanyň gündogarynda synag taslamasydyr. Ol bölekleýin hökümet tarapyndan maliýeleşdirilýär.
