Ispaniýanyň çempionatynyň 34-nji tapgyrynyň duşuşygynda ýekşenbe güni «Barselona» myhmançylykda «Espanýoly» 4:2 hasabynda ýeňdi.
Duşuşykda «Barselonadan» gollary Robert Lewandowski (11-nji, 41-nji minutlar), Alehandro Balde (20), Žýul Kunde (53) geçirdi. «Espanýoldan» Hawýer Puado (73) we Hoselu (90+2) tapawutlandy.
«Barselona» 34 tapgyrdan soň çempionatda 85 utuk toplap, ikinji ýerden ýerleşýän «Realdan» (71 utuk) arany ýetip bolmajak derejede açdy. Netijede katalon kluby möhletinden öň çempionlyk gazandy.
«Barselona» taryhynda 27-nji gezek Ispaniýanyň çempiony boldy. Soňky gezek kataloniýalylar 2018/19 möwsümde çempionlyk gazanypdylar, şondan bäri iki gezek «Real» (2019/20, 2021/22), bir gezek Madiriň «Atletikosy» (2020/21) çempion boldy.
