Günorta Amerikanyň Futbol konfederasiýasy (KONMEBOL) Lukede (Paragwaý) geçirilen 2022-nji ýylyň dünýä çempionlaryny gutlamak dabarasynda Lionel Messiniň heýkelini görkezdi. Bu barada KONMEBOL-yň resmi saýtyna salgylanyp, rsport.ria.ru habar berýär.
Dekabr aýynda Argentinanyň milli ýygyndysy 1986-njy ýyldan bäri ilkinji gezek dünýä çempiony boldy. Messi finalyň we tutuş ýaryşyň iň gowy oýunçysy diýlip saýlandy. Final oýnunda Argentinanyň ýygyndysy penalti tapgyrynda fransiýalylary utdy.
La Noche de las Estrellas (“Ýyldyzlar gijesi”) atly çärede Messi KONMEBOL-yň prezidenti Alehandro Domingesden milli topar bilen gazanylan kuboklaryň nusgalaryny, şeýle-de konfederasiýanyň muzeýinde Diego Maradonanyň we Peleniň heýkelleri bilen bir hatarda goýuljak hakyky ululygyndaky heýkeli aldy. Argentinanyň milli ýygyndysynyň beýleki oýunçylaryna indiwidual medallar we heýkeljikler gowşuryldy.
«PSŽ-de» çykyş edýän Messi ýedi gezek “Altyn topuň” eýesi boldy. Ol Argentinanyň milli ýygyndysynyň düzüminde Olimpiýa oýunlarynda (2008) we Amerikanyň kubogynda (2021) ýeňiş gazandy. Fewral aýynyň ahyrynda Messi FIFA-nyň 2022-nji ýylyň iň gowy oýunçysy üçin baýragyny aldy.
