Ispaniýanyň çempionatynyň lideri «Barselona» Hawi ady bilen tanalýan baş tälimçi Hawýer Ernandes bilen şertnamany uzaldar. Täze şertnama 2026-njy ýylyň tomsuna çenli hereket eder.
«Barselona» we onuň baş tälimçisi Hawi Ernandes täze şertnama boýunça gepleşiklere başlady. Klub 43 ýaşly hünärmeniň oňyn jogabyna bil baglaýar.
TASS agentliginiň habaryna görä, Hawi öz klubunda işlemekden hoşal we şertnamany uzaltmaga razy bolar. Bu möwsümde «Barselona» onuň ýolbaşçylygynda Ispaniýanyň Superkubogyny aldy we La Ligada öňde barýar. Şeýle-de bolsa, katalonlylar ýewrokuboklary almak ugrundaky ýaryşlarda şowsuz çykyş edip, ilki Çempionlar ligasyndan, soň bolsa Ýewropa ligasyndan gaýtdylar.
Hawi Ernandes 1998-nji ýyldan 2015-nji ýyla çenli «Barselonada» ýarymgoragçy bolup oýnady we topar bilen 25 kubok gazandy. 2021-nji ýylyň dekabrynda Hawi baş tälimçi hökmünde katalon klubuna gaýdyp geldi.
