Prezident Serdar Berdimuhamedow Gresiýa Respublikasynyň Prezidenti hanym Katerina Sakellaropula Larisa şäheriniň golaýynda bolup geçen, köp sanly adam pidalaryna we şikes ýetmelerine getiren pajygaly demir ýol heläkçiligi zerarly gynanç hatyny iberdi.
Döwlet Baştutany şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini ýetirdi, ejir çekenlere bolsa tiz wagtda sagalmaklary baradaky dileglerini beýan etdi.
1-nji marta geçilýän gijede Larisa şäheriniň golaýynda ýolagçy otlusy bilen ýük demir ýol düzümi çaknyşdy. Netijede üç wagon relsden çykdy, ýangyn döredi. Ýurtda üç günlük matam yglan edildi.
Heläkçilik zerarly aradan çykanlaryň sany 57 adama ýetdi, ýene 56 adam dereksiz ýiten hasaplanylýar.
Soňky maglumatlara görä, şikes alan 48 adam häzir hassahanalarda bejergi alýar, şolaryň altysynyň ýagdaýy agyr. Umumylykda, iki otly düzüminde jemi 354 adam (342 ýolagçy we 12 sany işgär) bardy.
