Madridiň “Realynyň” öňki oýunçysy Garet Beýl professional golf oýunçysy hökmünde karýerasyna başlaýar. Bu barada Uelsiň milli ýygyndysynyň öňki lideri sosial ulgamlarda habar berdi. Muny sputnik.by ýetirýär.
“Size indiki aýyň başynda AT&T Pebble Beach Pro-Am ýaryşynda oýnajakdygymy habar bermäge şat” – diýip, Beýl Instagramda ýazdy.
Ýatlap geçsek, ýanwar aýynda 33 ýaşly Beýl futbol karýerasyny tamamlaýandygyny mälim edipdi.
Ýeri gelende bellesek, uelsli türgen diňe bir “Realdaky” oýunlary bilen däl, eýsem golfa bolan söýgüsi bilen hem tanalýar. Ol köplenç klubuň oýunlaryna taýýarlanman, golf oýnamaga köp wagt sarp edýändigi üçin klubuň janköýerleri tarapyndan tankytlanýardy. Ýewro-2020-e çykylmagyny Beýl Uelsiň “Uels. Golf. Madrid. Şu tertipde” ýazgyly baýdagy bilen belledi. Katarda geçirilen dünýä çempionatynda bolsa Uelsiň milli ýygyndysynyň tälimçilik ştaby oýunça diňe futbola üns bermegi üçin golf oýnamagy gadagan etdi.
“Realyň” düzüminde Beýl Çempionlar ligasynyň bäş gezek ýeňijisi, Ispaniýanyň üç gezek çempiony, ýurduň Kubogynyň we Super kubogynyň eýesi, UEFA-nyň Super kubogynyň iki gezek eýesi boldy, dört gezek Klublaýyn dünýä çempionatynda ýeňiş gazandy.
