Aşgabada iş saparynyň çäklerinde RF-niň Tatarystan Respublikasynyň Prezidenti Rustam Minnihanow Türkmenistanyň Prezidenti Serdar Berdimuhamedow bilen duşuşdy.
Tatarystan Respublikasynyň Prezidenti türkmen topragynda bildirilen myhmansöýerlik üçin hoşallygyny beýan edip, Türkmenistana nobatdaky gezek gelip görmek we ýurtda geçirilýän möhüm çärelere, şol sanda Ahal welaýatynyň baş metjidiniň düýbüni tutmak çäresine gatnaşmak mümkinçiligine örän şatdygyny aýtdy.
Söhbetdeşligiň barşynda türkmen-tatar gatnaşyklarynyň häzirki ýagdaýy hem-de hyzmatdaşlygyň ileri tutulýan ugurlary barada içgin pikir alyşmalar boldy. Türkmenistanyň Tatarystanyň iri kompaniýalary bilen köpýyllyk özara bähbitli hyzmatdaşlygy bar bolan mümkinçilikleri netijeli peýdalanmagyň aýdyň mysalydyr.
Birnäçe ugurlar, hususan-da, ýangyç-energetika toplumy, ulag, dokma senagaty, oba hojalygy, maşyn we gämigurluşyk ulgamlary boýunça hyzmatdaşlyk köpugurly türkmen-tatar gatnaşyklarynda aýratyn orny eýeleýär.
Tatarystanyň Prezidenti şeýle hem medeniýet, ylym we bilim ulgamlarynda türkmen-tatarystan gatnaşyklarynyň ösdürmegiň wajyplygyny belledi.
«Häzirki wagtda Tatarystanyň ýokary okuw mekdeplerinde 6212 sany türkmen talyby bilim alýar. Bu örän uly san. Biziň uniwersitetlerimiz türkmenistanly talyplaryň yhlaslylygyny belleýärler» - diýip, Minnihanow belledi.
