Türkmenistanda ýokary we orta hünär okuw mekdeplerine ýüz tutýan dalaşgärlere harby gulluga çagyryş möhletini yza süýşürmäge mümkinçilik berýän «Harby borçlulyk we harby gulluk hakynda» Türkmenistanyň Kanunyna girizilen goşmaçalar şu gün Türkmenistanyň resmi metbugatynda çap edildi.
Kanunyň tekstinde bellenilişi ýaly, harby gullugy yza süýşürmeklik «umumy bilim edaralaryny we ýörite bilim edaralaryny tamamlan ýylynda Türkmenistanyň ýokary we orta hünär okuw mekdeplerine we daşary ýurtlara giriş synaglaryna gatnaşmaga isleg bildirýänlere degişlidir».
Şeýlelik bilen, harby gullugy yza süýşürmek baradaky bu goşmaça, ýaňy orta mekdebi tamamlan, ýokary ýa-da orta hünär okuw mekdeplerine girmek isleýän ýaşlara degişlidir. Bilim edaralary Türkmenistanyň çäginde we daşary ýurtlarda ýerleşip biler.
