Häzirki wagtda Mejlisde döredilen iş toparlarynda ministrlikleriň we pudaklaýyn dolandyryş edaralarynyň tekliplerine seljerme geçirilýär, Raýat, Zähmet kodeksleriniň rejelenen görnüşleriniň taslamasyny taýýarlamak işleri alnyp barylýar. Hereket edýän kanunçylyk namalaryna üýtgetmeleri we goşmaçalary girizmek boýunça kanun taslamalary işlenip taýýarlanylýar.
14-nji aprelde Awazada geçirilen Hökümetiň göçme mejlisinde Milli Geňeşiň Mejlisiniň Başlygy G.Mämmedowanyň habar berşi ýaly, Mejlisiň şu ýylyň 2-nji aprelinde geçirilen on ýedinji maslahatynda kabul edilen birnäçe kanunlaryň taslamalary Milli Geňeşiniň Halk Maslahatynyň garamagyna iberildi.
Bellenilişi ýaly, Mejlisiň deputatlary, şol sanda Balkan welaýatyndan saýlanan deputatlar öz saýlaw okruglarynda saýlawçylar, obalaryň we şäherleriň ýaşaýjylary bilen yzygiderli duşuşýarlar, ýurdumyzda hereket edýän kanunlary düşündirýärler, adamlaryň pikirlerini, tekliplerini öwrenýärler. Şunuň bilen baglylykda, 6 — 8-nji aprelde Milli Geňeşiň, hukuk goraýjy edaralaryň, jemgyýetçilik birleşikleriniň we beýleki guramalaryň wekilleri Balkan welaýatynda iş saparynda bolup, wagyz-nesihat duşuşyklaryny geçirdiler.
