14-nji dekabrda Daşary işler ministrliginiň binasynda 10-njy dekabrda geçirilen Türkmenistanyň Hökümetiniň giňişleýin mejlisiniň, şeýle-de 11-nji dekabrda türkmen paýtagtynda guralan «Parahatçylyk we ynanyşmak syýasaty — halkara howpsuzlygyň, durnuklylygyň we ösüşiň binýady» atly halkara maslahatyň jemlerine bagyşlanan «tegelek stol» maslahaty geçirildi. Oňa ýurdumyzyň daşary syýasat edarasynyň ýolbaşçylary we işgärleri, Türkmenistanyň daşary ýurtlardaky diplomatik wekilhanalarynyň ýolbaşçylary gatnaşdylar.
TDIM-niň Metbugat gullugynyň habar berşi ýaly, parahatçylyk we ynanyşmak forumynyň netijeleri boýunça kabul edilen Jemleýji resminama çärä gatnaşanlaryň üns merkezinde boldy. Çykyş edenler Jemleýji resminamany kabul etmek hem-de beýan edilen başlangyçlary hemmetaraplaýyn goldamak arkaly, foruma gatnaşyjylaryň Birleşen Milletler Guramasyna agza döwletleriň ählisini Halkara Bitaraplyk güni mynasybetli her ýylyň 12-nji dekabrynda halkara parahatçylygy, howpsuzlygy we durnukly ösüşi saklamakda hem-de pugtalandyrmakda Bitaraplyk syýasatynyň orny we ähmiýeti barada jemgyýetçiligiň habarlylygyny ýokarlandyrmaga gönükdirilen çäreleri işjeň geçirmäge çagyrandyklaryny aýratyn nygtadylar.
Mälim bolşy ýaly, Aşgabatda geçirilen ýokary derejeli foruma gatnaşyjylar Jemleýji resminamany kabul etmek bilen, Türkmenistanyň Prezidentiniň «Dialog — parahatçylygyň kepili» diýen ählumumy başlangyjyny ilerletmek boýunça teklibi goldadylar.
Türkmenistanyň Prezidentiniň tabşyrygy boýunça Halkara parahatçylyk we ynanyşmak ýyly mynasybetli döwletimiziň daşary ýurtlardaky diplomatik wekilhanalarynyň ýolbaşçylarynyň gatnaşmagynda geçiriljek mowzuklaýyn duşuşyklar şu ýylyň ahyryna çenli dowam eder.
