Türkmenistan we Dagystan Respublikasy Türkmenbaşynyň halkara deňiz porty bilen Mahaçkala deňiz söwda portunyň arasynda parom aragatnaşygyny gaýtadan ýola goýmak barada gepleşikleri geçirýär.
Hususan-da, dagystan tarapy ýük awtoulaglary üçin türkmen ýük paromlaryny kabul etmäge taýýardygyny mälim etdi. ORIENT agentliginiň habar bermegine görä, bu barada Dagystanyň wagtlaýyn ýolbaşçysy Sergeý Melikow Respublikanyň ulag, ýol gurluşygy, awiasiýa we demir ýol aragatnaşygy boýunça giňeldilen ýygnagynda aýtdy.
Mahaçkala deňiz söwda porty Dagystanyň ulag infrastrukturasynyň strategiki desgasy bolup durýar. Şu nukdaýnazardan, parom gatnawyny guramak ýakyn geljek üçin ösüşiň ileri tutulýan ugurlarynyň biridir.
Portdaky parom gatnawynyň mukdaryny yzygiderli ýokarlandyrmak geljekde konteýner ýükleriniň, şol sanda ýöriteleşdirilen terminallarda ýük daşamagyny ösdürmäge mümkinçilik berer.
Şunuň bilen baglylykda, Dagystan Türkmenistan bilen hyzmatdaşlygyň hem-de Eýran bilen parom gatnaşygyny açmagyň geljegine seredýär.
