Günbatar Afrikanyň 15 döwletiniň umumy pul birligi 2027-nji ýylda güýje girer. Bu barada, Reuters agentliginiň habar bermegine görä, Günbatar Afrika ýurtlarynyň Ykdysady Bileleşiginiň (ECOWAS) sammitiniň ahyrynda guramanyň Komissiýasynyň ýolbaşçysy Žan-Klod Kassi Bru aýtdy. Muny TASS ýetirýär.
Bellenilişi ýaly, sammit 2027-nji ýylda ECOWAS-yň 15 ýurdunyň umumy pul birligini çykarmak boýunça täze ýol kartasyny kabul etdi. Häzirki wagtda Günbatar Afrikanyň sekiz ýurdy frank zonasyna girýär we olaryň pul birligi hökmünde Günbatar Afrika franky (Afrikanyň maliýe bileleşiginiň franky) bar. Sebitiň galan döwletleriniň hususy milli pul birligi bar.
2019-njy ýylyň dekabr aýynda ECOWAS-a agza ýurtlar Günbatar Afrika frankynyň walýuta zonasynyň mehanizmini üýtgetmek barada Fransiýa bilen ylalaşdylar. Ylalaşyga laýyklykda, Günbatar Afrika franky eko (ECOWAS abbrewiaturasynyň ilkinji üç harpyndan alnan) adyny alýar, ýöne ýewro bagly bolmagynda galýar. Şol bir wagtyň özünde Afrikanyň maliýe bileleşiginiň frank zonasyna girýän ýurtlaryň walýuta ätiýaçlyklarynyň 50%-niň Fransiýanyň Merkezi bankynyň hasabynda saklanýandygyny görkezýän düzgün ýatyrylýar. Şeýle-de, Günbatar Afrika ýurtlarynyň maliýe bileleşiginiň dolandyryjy geňeşinde Fransiýanyň wekiliniň bolmagy baradaky talap hem ýatyrylýar.
Günbatar Afrika franky pul birligi hökmünde 1945-nji ýylyň dekabr aýynda Günbatar we Ekwatorial Afrikadaky fransuz emläkleriniň çäginde fransuz hökümetiniň karary bilen güýje girizildi. Şu güne çenli frank zonasy Günbatar Afrikanyň sekiz döwletini we Merkezi Afrikanyň alty ýurduny öz içine aldy.
