Ýewropa çempionatynyň toparlaýyn tapgyrynyň soňky duşuşygynda Germaniýa Wengriýa bilen deňme-deň oýnady.
Oýunda hasaby 11-nji minutda Adam Salai açdy. Ikinji ýarymda Kaý Hawerts (66) hasaby deňledi. Iki minutdan wengriýalylar Andraş Şeferiň tagallalary bilen ýene-de öňe saýlandylar.
Germaniýany halas eden pökgini oýnuň gutarmagyna dört minut galanda Leon Goreska geçirdi.
F toparda ugurdaş duşuşykda Portugaliýanyň milli ýygyndysy Fransiýa bilen deňme-deň oýnady. Kriştianu Ronaldu hem-de Karim Benzema dubl etdi.
Portugaliýaly ýyldyz oýunçy eýranly Ali Daeniň milli ýygyndysy üçin geçiren gol sany boýunça rekordyny gaýtalady. Ronaldunyň hasabynda indi 109 gol bar.
Toparlaýyn tapgyryň netijeleri boýunça fransuzlar toparda birinji orny eýelediler. Germaniýa ikinji orunda, Portugaliýa üçünji orunda ýerleşdi. Ýygyndylaryň üçüsi hem Ýewro-2020-niň 1/8 final tapgyryna çykdy.
