Ispaniýa bilen Portugaliýa 2030-njy ýyldaky futbol boýunça Dünýä çempionatyny geçirmek üçin bilelikdäki teklibi resmi taýdan hödürlediler. Iki ýurduň premýer-ministrleri Madridde degişli resminama gol çekdiler, şondan soň iki ýygyndy toparyň arasynda dostlukly oýun geçirildi. Oýun nol hasap bilen tamamlandy. Bu barada ru.euronews.com habar berýär.
DÇ-2030 taryhdaky ilkinji futbol boýunça dünýä çempionatyndan dogry 100 ýyl soň geçiriler. Ýubileý birinjiligi geçirmäge Argentinanyň, Paragwaýyň, Urugwaýyň we Çiliniň toparlaýyn ýüz tutmasy dalaş edýär. Hut Urugwaýda 1930-njy ýylda ilkinji Çempionat geçirilipdi. Mundialy geçirmek isleýän ýurtlaryň ýene bir topary – Bolgariýa, Gresiýa, Rumyniýa we Serbiýa. Bu barada FIFA 2024-nji ýylda gutarnykly saýlaw eder.
Indiki dünýä çempionaty 2022-nji ýylda Katarda geçirilmeli, ýurduň howasynyň aýratynlyklary sebäpli, ol noýabr aýynyň ahyrynda – dekabr aýynyň başynda geçiriler. 2026-njy ýyldaky dünýä çempionatyny Kanada, ABŞ we Meksika bilelikde kabul eder.
