Tomusky Olimpiýa oýunlarynyň öň ýanynda türgenleriň ilkinji tapgyry Ýaponiýa gelip başlady. Softbol boýunça Awstraliýanyň zenanlar ýygyndysyny alyp gelen uçar Narita howa menzilinde garşy alyndy diýip, euronews.com habar berýär.
Toparyň 30 adamdan ybarat bolan ähli agzasyna koronawirusa garşy sanjym edildi. Olar 3 günläp myhmanhanada bolmak bilen, Tokionyň demirgazygyndaky Ota şäherinde türgenleşiklere başlarlar.
Häzirki wagtda 2020-nji ýylda pandemiýa sebäpli yza süýşürilip, şu ýylyň 23-nji iýulyndan 8-nji awgusty aralygynda geçiriljek tomusky Olimpiýa oýunlaryna Ýaponiýada güýçli depginde taýýarlyk görülýär. Muňa garamazdan, ýaponlaryň aglabasy bu oýunlaryň geçirilmezliginiň tarapdary: oňa dünýäniň 200-den gowrak döwletinden türgenleriň 15 müňüsi gatnaşar, bu bolsa koronawirus bilen kesellänleriň sanynyň artmagyna sebäp bolup biler. Ilatyň arasynda geçirilen soňky pikir soraşmalara görä, ýaponlaryň aglabasy Olimpiadanyň we Paralimpiadanyň yza süýşürilmegini ýa-da asla ýatyrylmagyny talap edipdi.
