Ispan «Willarealy» Ýewropa ligasynyň finalynda iňlisleriň «Mançester Ýunaýtedini» ýeňip, taryhda ilkinji gezek ýaryşyň ýeňijileri bolmagy başardylar.
Duşuşyk Polşanyň Gdansk şäherinde geçirildi. Oýnuň esasy wagty 1:1 hasabynda tamamlandy. 11 metrlik jerime urgy tapgyrynda iki klubuň oýunçylary 22 urgy ýerine ýetirdiler. Şolardan 21-si dürs ýerine ýetirildi. Emma «Mançester Ýunaýtediň» derwezewany Dawid De Hea öz 11 metrlik jerime urgusyny geçirip bilmedi, netijede «Willareal» 11:10 hasap bilen üstün çykdy.
«Mançester Ýunaýted» we «Willareal» özara bäşinji gezek duşuşdylar. Olaryň deslapky dört duşuşyklary 0:0 hasabynda tamamlandy. Ispan klubunyň tälimçisi Unai Emeri Ýewropa ligasynda dört gezek ýeňiş gazanan ilkinji tälimçi boldy. Ondan öň, ol «Sewilýa» bilen bu ýaryşda üç gezek ýeňiji bolupdy.
