2020-nji ýyldaky Ýewropa çempionatynyň resmi saundtreki belli boldy. Bu aýdym gollandiýaly dijeý Martin Garriks we irlandiýaly U2 toparynyň agzalary Bono bilen Ej tarapyndan döredildi. Aýdym “We are The People” (“Biz – adamlar”) diýlip atlandyryldy. Bu barada sport24.ru habar berýär.
“Ahyrsoňy men şu ýyl Ýewro-2020 futbol ýaryşynyň resmi aýdymy bolan, Bono bilen Ejiň gatnaşmagynda döreden “We are The People” atly täze aýdymymy paýlaşyp bilýärin” – diýip, Garriks öz kanalynda ýazdy.
Ýatlap geçsek, Ýewro-2020 2021-nji ýylyň 11-nji iýunyndan 11-nji iýuly aralygynda Ýewropanyň 11 şäherinde (Amsterdam, Baku, Budapeşt, Buharest, Glazgo, Kopengagen, London, Mýunhen, Rim, Sankt-Peterburg, Sewilýa) geçiriler. Öň Ýewropanyň futbol assosiasiýalarynyň bileleşigi (UEFA) toparlaýyn tapgyryň üç oýnunyň Dublinden Sankt-Peterburga geçirilendigini mälim etdi. Şeýlelik bilen, Russiýanyň bu şäheri toparlaýyn tapgyryň alty oýnuny we 1/4 finalyň bir oýnuny kabul eder.
