Belarusly paralimpiýa türgeni Alekseý Talaý suwda ýüzmek boýunça dünýä rekordyny täzeledi. Ol Linýano-Sabbiadoro (Italiýa) şäherinde geçirilen suwda ýüzmek boýunça IPC Dünýä seriýasynda çykyş etdi. Talaý bras görnüşi boýunça 50 metr aralygy 1:18:42 wagtda geçdi. Ol iň agyr SB1 synpynda bäsleşdi diýip, Sputnik gullugy habar berdi.
Türgen toplumlaýyn ýüzmekde 150 metr aralykda ýene bir altyn baýraga mynasyp boldy we bu aralygy 5 minutda geçdi. Alekseý öz şahsy netijesinden 10 sekunt ir geldi.
Ýeri gelende belläp geçsek, Alekseý Talaý 1999-njy ýylyň 8-nji maýynda, 16 ýaşynda el-aýagyndan mahrum boldy: ol Ikinji Jahan urşy döwrüniň minasyndan ýaryldy. Betbagtçylykdan ozal ol baýdarkada ýüzýärdi, karate, dzýudo, suwda ýüzmek bilen meşgullanýardy.
Güýçli partlamadan soň, Talaý 2016-njy ýylda sporta gaýdyp geldi. Häzir ol ýüzmek boýunça ençeme dünýä we Ýewropa rekordlarynyň eýesi. Paralimpiýa sporty boýunça ol ýurduň milli ýygyndysyna yzygiderli çagyrylýar. Häzir ol bar ünsüni jemläp, Tokioda geçiriljek Paralimpiýa oýunlaryna taýýarlyk görýär.
