UFC-niň ýeňil agramdaky çempiony Habib Nurmagomedow resmi taýdan karýerasyny tamamlady. Bu barada UFC-niň ýolbaşçysy Dana Uaýt özüniň Twitter sahypasynda yglan etdi.
- Ol karýerasyny resmi taýdan 100% tamamlady. Seniň işleýşiňe tomaşa etmek täsindi. Habib, hemme zat üçin sag bol, indiki boljak zatlardan lezzet al, dostum - diýip, Uaýt ýazdy.
2020-nji ýylyň oktýabr aýynda Nurmagomedow amerikaly Jastin Getjini ýeňip, ýeňil agramda çempionlyk adyny üçünji gezek gorady we karýerasyny tamamlaýandygyny mälim etdi. Ol bu kararyny ejesine beren wadasy bilen düşündirdi.
Uaýt onuň bilen ýene bir söweş barada gepleşik geçirýärdi. Türgen özüni gyzyklandyrjak garşydaş bar bolsa gaýdyp gelmäge boýun boldy.
32 ýaşly Nurmagomedow ýekeje gezek hem ýeňilmezden MMA-da 29 söweş geçirdi.
