Kataloniýanyň polisiýasy “Barselonanyň” öňki prezidenti Hosep Bartomeuny tussag etdi diýip, “Cadena Ser” radiostansiýasy habar berýär. Muny gazeta.ru ýetirýär.
Çeşmäniň maglumatlaryna görä, baş direktor Oskar Grau bilen hukuk bölüminiň başlygy Roman Gomes Ponti hem tussag edildi.
1-nji martda hukuk goraýjy edaralar katalon klubunyň edarasynda barlag işini geçirdiler. Bu derňew klub ýolbaşçylaryny ýolbaşçylygy tankytlaýan klubuň häzirki we öňki oýunçylaryna garşy sosial ulgamlarda töhmetçilikli kampaniýany geçirmekde aýyplaýan kazyýet işi bilen baglanyşyklydyr. “Barselona” tussag edilmeler baradaky maglumaty heniz tassyklamady.
Ýatlap geçsek, takmynan, bir aý mundan ozal KHBS-de Lionel Messiniň şertnamasy ýaýradyldy. Bartomeu, Grau we Ponti maglumatlaryň ýaýramagyna gatnaşan bolmagy mümkin şahsyýetleriň arasynda görkezildi.
Bartomeu 2014-nji ýyldan 2020-nji ýyl aralygynda “Barselonanyň” prezidenti boldy. 2021-nji ýylyň 7-nji martynda “Barselonanyň” prezident saýlawlary geçer. Bu wezipä Žoan Laporta, Wiktor Font we Toni Freýşa dalaş edýär.
