Argentinanyň ýygyndy toparynyň ozalky futbolisti, häzirki wagtda “Himnasiýa we Esgrima” klubynyň baş tälimçisi Diego Maradonanyň Ispaniýanyň milli toparynyň halypasy wezipesini eýelemegi mümkin. Bu barada “Infobae” neşiri habar berýär, muny euro-football.ru ýetirýär.
Çeşmäniň habar bermegine görä, 59 ýaşly hünärmen Ispaniýanyň Şa futbol federasiýasynyň (RFEF) ýolbaşçy wezipesine dalaşgär Antonio Torres bilen deslapky dilden ylalaşygy gazandy. Eger-de Torres RFEF-de geljekki saýlawlarda ýeňse, onda Maradona bilen iki ýyla niýetlenilen zähmet şertnamasyna gol çekilip bilner. Wezipe — DÇ-2022-niň finalyna ýetmek bolar. Ýatlap geçsek, 2018-nji ýyldan bäri Ispaniýanyň ýygyndy toparynyň baş tälimçisi wezipesini Luis Enrike eýeleýär. Onuň bilen topar koronawirus sebäpli 2021-nji ýyla geçirilen Ýewro-2020-ä çykdy.
Maradona 2019-njy ýylyň sentýabrynda “Himnasiýany” esaslandyrdy. Mundan öň ol meksikan “Doradosda” hem-de BAE-den “Al-Waslda” we “Al-Fujaýrada” işledi, şeýle-de Argentinanyň ýygyndy toparyna ýolbaşçylyk etdi. Iýunyň başynda Maradona “Himnasiýa” bilen şertnamany 2021-nji ýylyň ahyryna çenli uzaltdy. Dünýä futbolynyň ýyldyzy özüniň özboluşly we kähalatlar dawaçyl hereketleri bilen bellidir.
Maradona Ispaniýanyň ýygyndy toparyna ýolbaşçylyk edip biler
- 01.07.2020 18:45
- 6.8k+
