“Liwerpul” Angliýanyň çempiony boldy

“Çelsiniň” futbolistleri Angliýanyň premýer-ligasynyň oýnunda “Mançester Sitini” utdular. Bu barada kommersant.ru habar berýär. Duşuşyk 2:1 hasaby bilen tamamlandy. Gollary Pulişiç (36), Willian (78) – De Brýoýne (55) geçirdi.
Bu netije “Mançester Sitiniň” APL-nyň wagtyndan öň çempiony bolýan “Liwerpulyň” yzyndan ýetip bilmejekdigini aňladýar. “Liwerpulyň” hasabynda 89 utuk, “Mançester Sitiniň” hasabynda 64 utuk bar.
“Liwerpul” 30 ýyl Angliýanyň çempiony bolmandy, soňky gezek toparyň futbolistleri kubogy 1990-njy ýylda utdular. Klub çempionaty jemi 18 gezek utdy, “Mançester Ýunaýted” bolsa 20 gezek.
Mundan başga-da, “Liwerpul” Angliýanyň Kubogynyň ýedi gezek eýesi, Liganyň kubogynyň sekiz gezek eýesi, Angliýanyň Superkubogynyň 15 gezek, UEFA-nyň kubogynyň üç gezek eýesi, Çempionlar ligasynyň alty gezek, UEFA-nyň Superkubogynyň dört gezek eýesi boldy. Ol gazanan baýraklarynyň sany boýunça Angliýanyň klublarynyň arasynda arassa birinji ýere çykdy. Baýraklary boýunça ikinji ýerde “Mançester Ýunaýted” ýerleşýär, onuň hasabynda 42 titul bar. Belläp geçsek, ýeňişden soň “Liwerpulyň” müňlerçe janköýerleri şäheriň köçelerine çykyp, 30 ýylyň içindäki ilkinji çempionlygy baýram edip bellediler.