«Barselona» we «Ýuwentus» Arturyň transferini ara alyp maslahatlaşýarlar

Turiniň «Ýuwentusy» bilen Kataloniýanyň «Barselonasy» ýarymgoragçy Arturyň transfer edilmegi barada ylalaşdylar, geleşigiň bahasy, takmynan, 80 million ýewro bolar diýip, “Sky Sports” habar berýär.
Braziliýanyň milli ýygyndysynyň ýarymgoragçysy maý aýynda iki klubuň wekillerine hem “gök-narynçlaryň” hataryndan çykmak niýetiniň ýokdugyny, “Kamp Nou”-da galyp, esasy düzümde ýerleşmek ugrunda göreşmek isleýändigini aýdypdy. Şeýle-de bolsa, “Ýuwe” Artury Maurizio Sarriniň toparynda esasy oýunçy bolmaga ynandyryp biljekdigine umyt baglaýar. Turinliler 23 ýaşly oýunçy üçin ýylda 5 million ýewro töweregi aýlyk teklip etdiler. Ýeri gelende bellesek, bu Arturyň Barselonadaky häzirki girdejisinden has köpdür.
Mundan başga-da, iki klubyň şertnamany 30-njy iýundan öň ýapmak isleýändigi habar berildi, ýöne «Ýuwentusyň» sport direktory Fabio Paratiçi bu maglumatlary inkär etdi.
“Barselona” hem öz gezeginde “Garry Senýorlaryň” liderlerinden biri Miralem Pýaniç bilen gyzyklanýar, klublar bosniýaly oýunçynyň transfer bahasy barada gepleşikleri dowam etdirýärler. “Ýuwentus” 30 ýaşly ýarymgoragçynyň transfer bahasynyň, takmynan, 70 million ýewro boljakdygyny aýdýar.