La Liganyň ýolbaşçylygy ýakyn wagtda pandemiýa şertlerinde oýunlary geçirmegiň täzelenen medisina reglamentini hödürlemegi meýilleşdirýär. Taslamanyň maksady tomaşaçylary stadionlara bölekleýin goýbermekden ybarat bolar. Bu barada gazeta.ru habar berýär. Anyk seneler heniz belli däl, ýöne howpsuzlyk çärelerini berjaý etmek bilen, takmynan, stadionlarda orunlaryň üçden bir bölegi janköýerler bilen doldurylar. Çaklanylyşyna görä, janköýerler meýdança kiçiräk topar bolup goýberiler, şeýle-de her bir adamyň temperaturasy hökmany ýagdaýda ölçeniler. Eger-de tomaşaçynyň temperaturasy ýokary bolsa, ony oýna goýbermezler. Oýun wagtynda janköýerlere maska dakynmaly ederler. Mundan başga-da, stadionda antiseptikler bolar. Janköýerlere öz toparynyň goluny gutlap, beýlekiler bilen gujaklaşmazlyk maslahat berler. Gartaşan adamlar oýunlara gelip bilerler, ýöne olar oýnuň başlajak wagtyna golaý gelmeli we çykalga ýakyn ýerleşmeli bolarlar. Şeýle-de, adamlaryň hetdenaşa üýşmegine ýol bermez ýaly, janköýerleriň oýna geljek wagtyny bölüşdirmek hem meýilleşdirilýär.
Möwsümiň ahyryna çenli, La Liganyň prezidenti Hawýer Tebasyň aýtmagyna görä, oýunlarda 10-15% tomaşaçynyň bolmagyny maslahatlaşmak meýilleşdirilýär. Ýatlap geçsek, Ispaniýada futbol möwsümi ýakynda koronawirus arakesmesinden soň dikeldildi, ýöne häzir ähli oýunlar boş münberlerde geçýär.
Ispaniýa tomaşaçylary stadionlara goýberip başlamagy meýilleşdirýär
- 23.06.2020 21:01
- 4k+
