Janköýerler Fransiýada 11-nji iýuldan futbol stadionlaryna baryp bilerler

Fransiýada futbol stadionlary koronawirus ýaýrawy bilen göreş boýunça çäreleriň nobatdaky gowşadylyş tapgyryndan soň 11-nji iýuldan janköýerler üçin ýene-de açylar, bu barada Reýter agentligi ýurduň hökümetine salgylanmak bilen habar berýär, muny rsport.ria.ru ýetirýär.
Ilkibaşda stadionda janköýerleriň sany 5 müň möçber bilen çäklendiriler. Soňrak tomusda bu çäklendirme hem gowşadylyp bilner.
Şeýlelik bilen, koronawirus sebäpli näbelli möhlet bilen soňa goýlan Fransiýanyň kubogynyň we Fransuz ligasynyň kubogynyň finallary münberlerde tomaşaçylaryň gatnaşmagynda geçirilmäge mümkinçilik gazanýar. Fransiýanyň çempionaty häzirki möwsümiň koronawirus pandemiýasy sebäpli mart aýynda saklanylan, Ýewropanyň bäş sany öňdebaryjy milli birinjiliklerinden doly derejede oýnalmadyk we wagtyndan öň tamamlanan ýeke-täk birinjilik boldy. Täze möwsüm 22-nji awgustda başlanmaly.
Ýatlap geçsek, 28-nji aprelde Fransiýanyň çempionaty koronawirus sebäpli wagtyndan öň tamamlandy. Toparlar 38 tapgyrdan 28-sini geçirip ýetişdiler. “PSŽ” çempion diýlip yglan edildi. Fransiýanyň kubogynda “PSŽ” “Sent-Etýen” bilen, Liganyň kubogynyň finalynda bolsa “Lion” bilen duşuşar, iki duşuşygyň hem senesi soňrak belli bolar.