«Çelsi» Ronaldu üçin 120 mln ýewro sarp etmegi göz öňünde tutýar

“Ýuwentusyň” futbolistiniň häzirki möwsüm gutaranda iňlis klubyna geçmegi mümkin. 35 ýaşly oýunçynyň transfer bahasy 120 mln ýewro bilen bahalandyrylýar.
Rus işewüri Roman Abramowiçiň “Çelsi” iňlis futbol kluby tomus transfer penjiresinde “Ýuwentusyň” hüjümçisi Kriştianu Ronalduny satyn almakçy bolýar. Bu barada “Don Balon” we “Givemesport” neşirleri habar berýär. Muny sport.rbc.ru ýetirýär.
“Marca” ispan gazetiniň maglumatlary boýunça, “Çelsi” şu ýylda 35 ýaşy dolan Ronaldunyň geçmegi üçin 120 mln ýewro tölemäge taýýar.
Ronaldunyň satyn alynmagy tomus boýunça “Çelsiniň” ilkinji uly transferi bolmaz. Öň klub “Aýaksyň” ýarym goragçysy Hakim Ziýeş bilen şertnama baglaşdy. Ondan başga-da, londonlylar “Leýpsigden” hüjümçi Tim Werneriň geçmegini ýola goýmaga ýakyn.
Ronaldu “Ýuwentus” üçin 2018-nji ýylyň tomsundan bäri çykyş edýär. Şu wagta çenli ol klubyň düzüminde ýurduň Superkubogyny utdy we Italiýanyň çempiony boldy. Hüjümçiniň hasabynda 73 oýunda 53 goly we 14 netijeli geçirimi bar. Onuň şertnamasynyň möhleti 2022-nji ýylyň tomsunda tamamlanýar. Futbolist Madrid “Realyndan” italýan klubyna 100 mln ýewro geçdi. Öň ol karýerasynyň dowamynda “Mançester Ýunaýtediň” we “Sportingiň” düzüminde oýnady.
Roman Abramowiç “Çelsä” 2003-nji ýylyň iýunyndan bäri eýeçilik edýär. Şu wagta çenli klub transferlere 2 mlrd ýewro sarp etdi. Abramowiçiň eýeçilik edýän döwründe “Çelsi” 18 baýraga eýe boldy, şol sanda bäş gezek Angliýanyň çempionatyny utdy, Çempionlar ligasynda ýeňiş gazandy we iki gezek Ýewropa ligasyny utdy.