Ronaldu koronawirus pandemiýasy döwründe Instagramda iň köp gazanan türgen

“Ýuwentus” futbol klubynyň hüjümçisi Kriştianu Ronaldu Instagramda koronawirus pandemiýasy döwründe 12-nji martdan 14-nji maý aralygynda 2,1 mln ýewro gazandy, bu barada “Daily Mail” neşirine salgylanmak bilen news.ru habar berýär.
219 mln abunaçysy bolan Ronaldu iki aýyň içinde hemaýatkärlerinden dört sany mahabat postuny neşir etdi. Argentinaly Lionel Messi hem şonça post neşir etdi we 1,45 mln ýewro gazandy (151 mln abunaçysy bar), braziliýaly Neýmar dört posty üçin 1,33 mln ýewro gazandy (138 mln abunaçysy). Degişlilikde, bir mahabat posty Ronaldu 526 müň ýewro, Messä 363 müň ýewro, Neýmara bolsa 333 müň ýewro getirdi.
Dördünji orunda 2011-nji ýylda karýerasyny tamamlan meşhur basketbolçy Şakil O’Nil (17 mln abunaçysy bar) ýerleşdi. Ol şu iki aýyň içinde 16 sany şeýle posty neşir etdi. Bir post oňa 40,8 müň ýewro getirýär. Netijede, Şakil 653 müň ýewro gazandy. Bäşinji orny ozalky futbolist Dewid Bekham eýeledi (453 müň ýewro). Mundan başga-da, onluga hindi kriketçisi Wirat Kohli (424 müň ýewro), Zlatan Ibragimowiç (206 müň ýewro), ýaňy-ýakynda karýerasyny tamamlan basketbolçy Dueýn Ueýd (128 müň ýewro), Dani Alwes (120 müň ýewro) we britan boksçysy Entoni Joşua (109 müň ýewro) goşuldy.
Ýatladyp geçsek, futbol möwsümi mejbury karantinden soň ýuwaş-ýuwaşdan dikelýär.